Хотын орлогч Т.Даваадалайгаас өгсүүлээд авлига, албан тушаалын хэргээр Нийслэлийн удирдлагууд хууль хүчний байгууллагад шалгагдаж, дээлээ нөмөрч эхэлсэн. Хотын засаг дарга Х.Нямбаатар АТГ-т шалгагдсан даруй ажлаасаа огцорсон бол түүний гар хөлийн үзүүр болж явдаг Хотын Зам засвар арчлалтын хэлтсийн дарга О.Энхбаатарын хэрэг ч мөн ялгаагүй АТГ-т хэрэг бүртгэлээс мөрдөн байцаалтанд шилжжээ. Энэ этгээд бол дээр нэр дурдсан эрх мэдэлтнүүдийн гар хөл болж явдаг “Туулын хурдны зам” төслөөр мөнгө угаасан, авлигын хэргүүдийн гол хүн гэж үздэг. Учир юу гэвэл "Туулын хурдны зам" төслийн гүйцэтгэгч Хятадын “Хаоюань женерал констракшн” Нийслэлийн Засаг даргын тамгын газартай хууль бус гэрээ байгуулан 2.3 их наяд төгрөгийн гэрээ байгуулсан. Урдьчилгаа болгож нийслэлийн төсвөөс 500 тэрбум төгрөгийг тус компанийн оффшор дансанд шилжүүлсэн тухай бид өмнө олонтаа мэдээлж байсан. “China Hyway group limited” компанийн мөнгөөр Нийслэлийн ЗДТГ-ын хэлтсийн дарга нар болон Замын хөгжлийн газрын хэлтсийн дарга, мэргэжилтнүүд 2026 оны 01 дүгээр сарын 01-07-ны өдрүүдэд Малайз улсын Куала Лумпур хотод тансаг зэрэглэлийн аялал хийж, архидаж цэнгэж, үнэтэй бэлэг сэлт авсан нь хөдөлшгүй баримтаар нотлогдсон. Тэд хоногийн 1000 долларын үнэтэй “Sheraton” зочид буудал болон “Golden palm tree sepang” амралтын газарт долоо хоног авлигын мөнгөөр аялсан нь мөн хуулийн 15 зүйлийн 1, 16 зүйлийн 1.5.7 хуулийг ноцтой зөрчсөн. Энэхүү аяллыг Замын хөгжлийн газрын Зам засвар, арчлалт хяналтын хэлтсийн дарга О.Энхбаатар зохион байгуулж, удирдаж авч явсан байдаг.